Micu e le storie di campagna cincrundisa 3

Questa notizia è stata letta 74 volte

Micu e le storie di campagna cincrundisa 3

Terza e ultima parte delle storie di campagna cincrundisa. Cumpari Michele racconta a cumpari Micu il colloquio con Peppe, l’unico figlio rimasto a Cinquefrondi. 

Cumpari Micheli: 

Assettamundi a st’alivara, cumpari, ca vogghiju ‘mu vi cuntu. Di ‘na parti su cuntentu pe’ comu si mìsaru li cosi cu’ figghjima Peppi. Certu, idhu ‘nu pocu s’incazzàu ca nci ritirai la dèlica pemmu si pigghja li sordi mei di l’integrazzioni, ma capiscìu ca sbagliau pemmu m’abbanduna lu terrenu. Mò sugnu cuntentu, ca aieri a ‘nu certu puntu di la discussioni chi nd’èppimu, interveniu nipùtima Micheli, lu figghiju soi chi studia pe’ dottori agrariu a Riggiu. Mi fici quasi quasi ‘mu mi vennu li làcrimi. Quand’eu ncissi a Peppi ca nci ritirai la dèlica, idhu s’arràggiau, ma eu nci fici a capiscìri ca li sordi avìa pemmu li spendi pe’ la terra e no pemmu si li ijoca a lu grattebbinci, a l’enalottu e a li scummissi. Quandu lu colloquiu si ‘ncanìu, nipùtima Michelinu, cu docazzioni ndi cercau a tutti ddui se potìa diri du’ palori. Certamenti ! nci dissimu. Michelinu cuminciau ‘mu dici accussì: “Caro Papà, nonno Micheli ha mille raggioni, perché tu con i soldi che prendevi, che adesso si chiamano titoli del Premio Unico aziendali, dovevi fari qualche lavoro che hai fatto sul suo terreno. Eppuro io ti l’ho detto tanti volte, visto che sono orammai quasi lauriato in dottore Agrario, che quelli ottumila metri quatrati di terreno devono esseri tenuti bene e cortivati. L’alberi di ulivo vanno assolutamenti potati e tu non lo hai fatto mai. Se vogliamo l’olio, ma anche gli ortaggi, ti dico io cosa abbisogna fari.” Così nci dissi nipùtima ed eu mi emozzionai, mi stavanu venendu li lacrimi

Cumpari Micu:  Oh cumpari Micheli, e sulu pe’ chissu vi emozzionastivu ? Vi ‘ndebbulistivu a la Svizzera, allora!  

 Cumpari Micheli:  No, no ! Eu m’emòzzionai puru quando nipùtima Micheli si rivolgìu a mia e mi dissi :”Io ti devo ringrazziari nonno, perché se io sono un appassionato di agricoltura e se ho scelto di studiari pe’ dottori Agrario all’Università, è perché tu, tràmiti la tua vita che papà mi ha raccontato, mi hai trasmettuto l’amore per la terra, per il lavoro agricolo. Anche se tu, quando io sono nato, eri già in Svizzera e quindi abbiamo parlato poco, a me mi è abbastato di sapere che quando tornavi dal lavoro da quella grossa azienda agricola dove hai lavorato sempri a Polistina, continuavi pe’ qualche ora ancora nel tuo terreno. Io non mi dimentico mai l’olio e le verdure che ci portavi a casa.” E a ‘stu puntu, nipùtima si nd’accorgìu ca mi cummòvia, si girau verzu patrisa e nc’issi: “Papà, io ho ancora pochi mesi di studio prima di lauriarmi, doppo la lauria ho deciso di rimaneri in Calabria, perché tengo un proggetto con miei colleghi. Se nonno Michele c’ha piacere, mi impegno io a fari del suo terreno un giardino e a produrri l’olio per il consumo famigliare e per mandarlo pure a lui in Svizzera. Datemi tempo 3 anni e, se Dio vuole, vi dimostro che la terra non dorme mai, siamo noi che ci stiamo addormentando”.

 Cumpari Micu :  Benissimu cumpari Cheli, certi voti cu li figghij s’avi d’essari duri comu facistivu vui chi nci ritirastivu la dèlica. E poi, se cercanu scusa, allora li perdunamu: nu corpu a lu circhiju e natru a lu timpagnu, comu si soli diri. Secundu mia, lu niputi vostru ‘sta vota nci dimostra a pàtrisa comu eni necessariu ‘mu si curtiva la terra. Quasi quasi, doppu chi si lauria a Michelinu lu chiamu puru eu, ca vorrìa mu lu tegnu ancora megghiju lu terrenu, anchi se – non disprezzandu – eni unu di li megghiju cca jusu. 

Cumpari Micheli: jamunindi và. E viditi caru cumpari Micu – pe’ l’amicizzia chi ndavimu di chijù di sessant’anni- ca pretendu ‘mu mi telefonati a la Svizzera e mu m’impòrmati se daveru fìgghijuma Peppi faci quantu mi promettìu. Salutamundi, abbrazzamundi e….. a la bbona di Deu !

Condividi su Facebook

Condividi su Twitter